Talisay mopaayo sa fire truck
CEBU, Philippines - Gibuksan sa kabomberuhan sa Siyudad sa Talisay ang Fire Prevention Month kagahapon sa buntag.
Si Fire Senior Insp. Joel Abarquez, hepe sa kabomberuhan sa dakbayan, ang nangulo sa kalihukan uban ni Mayor Eduardo Gullas.
Usa ka motorkada ang gipahigayon aron pagpahibawo sa katawhan nga init na gyud karong panahona ug dili angay nga mokompiyansa sa kayo. Si Abarquez nagkanayon nga sa tanang higayon magmabinantayon gyud aron malikay sa sunog apan niining buwana doblehon sa katawhan ang pagkamabinantayon.
Si Gullas nipadayag nga iyang ipaayo ang usa ka fire truck nga aduna’y hagdanan.
Gikalipay ni Abarquez ang pasalig sa mayor ug siya niingon nga moabot sa P380 mil ang magasto nila sa pagpaayo niini.
Sa lima ka fire trucks sa Talisay, tulo lang niini ang magamit.
Adunay tulo ka fire trucks ang maabot karong katapusang kwarter niining tuiga. (BANAT NEWS)
- Latest
