Kalabera sa “ungo” nakit-an sa kisame

CEBU, Philippines — Usa ka misteryoso nga kalabera nga iya sa giingon nga “ungo” ang napalgan sa kisame sa panimay sa Barangay Poblacion, Dakbayan sa Talisay.

Si Ray Cervantes, nipahibawo sa DYSS Super Radyo GMA nga nakurat sila sa iyang nakita sa dihang iyang gipalimpyohan ang ilang kisame sa ilang ancestral house. Matud pa niya nga adunay mga buslot ang ilang kisame ug siya nagplano nga tapakan kini.

Pero sa paglili sa kisame usa ka kalabera ang ilang nakita nga kompleto pa ang porma. Apan sa ilang pagtan-aw lahi kini og porma kay nasusama kini og gamay nga T-Rex o dinosaur.

Nagkanayon si Cervantes nga “ungo” o sigbin ang paghulagway sa ilang mga silingan.

Sa iyang bahin, lahi gyud og porma ang kalabera ikumpara sa iring o iro kay tag-as ug dagko ang bangkil niini.

Matud pa ni Cervantes nga nakadiskubre pa gyud sila og laing bukog sa susama og porma hinungdan nga nahimo na kini nga duha apan ang usa nabungkag ang mga bukog niini.

Nagtuo si Cervantes nga magtiayon kini ug diha nagpuyo sa ilang kisame.

Sa milabay nga mga adlaw niingon si Cervantes nga maglagubo ang ilang kisame sa pagtuo niya nga iring o ilaga apan dagko nga lagubo ang madungog pero wa ra niya kini gipanumbaling.

“Ako raman siguro ni silang amigo kay wala man sab gyud sila mopakita nako. Kung ila kung hilabtan kay ako lang ra ba usa hagbay ra unta,” nagkanayon si Cervantes nga nahinabi sa DYSS Super Radyo GMA.

Sigon pa ni Cervantes nga ang mga katigulangan nag ingon nga nagdala og swerte ang ilang nakit-an nga kalabera kay ang nialsa niini nga nagkamatag tiki na ayo kini dayon.

Nitumaw sab ang estorya nga swerte sa sugal o sa negusyo ug sa relasyon ang bangkil sa kalabera. Andam hinuon si Cervantes nga mosurender sa kalabera sa ahensya sa gobyerno nga interesado niini. (BANAT NEWS)