CEBU, Philippines - Gipaabot nga sa hinapos niining bulana o sa unang semana sa Marso, mahuman na ug mahimong functional ang biometrics alang sa mga priso ug dalaw sa Cebu Provincial Detention and Rehabilitation Center (CPDRC).
Matud ni Dr. Gil Macato, acting warden sa CPDRC nga padayon pa ang encoding sa mga biometric ug nagtest run usab sila niini.
Ang CPDRC adunay gibutang nga computer sulod sa prisohan nga mokuha sa biometrics sa mga piniriso ug dalaw subay sa jail management system sa Kapitolyo.
Ang maong profiling system, pamaagi kini aron dali mailhan ang mga piniriso ug ingon man ang mga mobisita kanila.
Ang sistema matud ni Macato nga kun adunay bisita, inspeksyunon kini ug diritso sa ilang biometrics sa gate. Kun mabasa kini sa computer ug makita ang ilang hulagway, mamahimo na silang makasulod.
Sa pagsulod sa provincial jail, laing computer na usab ang ilang agi-an pagsusi sa biometrics sa priso lakip na ang fingerprint niini dayon sila makahimamat sa ilang bisitahon nga priso sulod sa 30 minutos.
Sa paggawas sa dalaw, moagi gihapon kini sa computer aron mahibaw-an kun kinsa ang nakagawas sa pasilidad.
Sa pagkakaron, ang CPDRC adunay 2,767 ka mga priso. (BANAT NEWS)