CEBU, Philippines - Nag-alayon ang Provincial ug Cebu City Disaster Risk Reduction and Management Offices sa pagpangandam sa dautang panahon atol sa Sinulog karong Domingo.
Matud sa pangulo sa CCDRRMO, Nagiel Bañacia, magamit ang Barangay Quick Response Team ug aduna silay mga tawo nga ipadala sa bukirang barangay kung may dautang panahon.
Ang PDRRMO andam usab sa ilang upat ka teams sa responders atol sa solemn procession sa Sabado ug sa Sinulog Grand Parade sa Domingo, matud ni Julius Regner, ang tigpamaba sa maong buhatan.
Ang kapin 100 ka responders sa PDRRMO lakip na ang gikan sa kalungsuran ug siyudad ang bahinon sa duha ka kalihukan ug ipahimutang sa mga stations sa Fuente Osmeña Rotunda, Imus, Elizabeth Mall ug Mango Avenue.
Samtang napulo ka health centers sa dakbayan ang ablihan alang sa mga minor injuries aron ang mga tambalanan alang lang sa mga seryuso nga pasyente.
Ang mga health centers nga ablihan karong Sabado ug Domingo gikan sa alas 6 sa buntag hangtud sa hapon naglangkub sa Cogon Ramos, Sta. Cruz, Zapatera, Day-as, Lorega, T. Padilla, Tejero, Carreta, Kamputhaw ug Bo. Luz.
Samtang ang Provincial Health Office mopadala sab og upat ka units alang sa Sinulog Grand Parade.
Matud ni Dr. Rene Catan, ang pangulo sa PHO, nga usa ka nurse, medical technologist ug driver maoy molangkub sa matag unit samtang on call ang doctor. Decemay P. Padilla, Brenda D. Batuto ug Le Phyllis F. Antojado (BANAT NEWS)