CEBU, Philippines - Andam ang kapolisan sa dakbayan sa Sugbo sa pagtubag sa bisan unsa nga hulga sa terorismo human gipagawas ang Level 3 Terror Alert sa nasud.
Si Cebu City Police Office Director PSSupt. Joel Doria niingon nga bisan og wala pa nigawas ang maong terror alert, gipahugtan na nila ang pagbantay sa dakbayan ilabi na nga nagkaduol na ang Pasko.
Gibutyag niini nga bag-ohay lang, naghimo sila og simulation exercises kauban ang mga sakop sa kasundalohan sa Central Command diin pagpang-kidnap ang ilang gihimo nga scenario.
Apan human nigawas ang pag-alerto, subli nga nipagawas og kamanduan si Doria nga mas pahugtan pa ang gihimo nila karon nga seguridad sa palibot ug paghimo sa mga checkpoints.
Nagpaabot pa sab si Doria kun unsa nga direktiba ang ilang himoon subay sa nagsingabot nga Pasko diin dagsaon sa daghang tawo ang mga malls. (BANAT NEWS)