Seguridad sa southern Cebu gipahugtan gihapon

CEBU, Philippines - Pag-deploy og mga daghang polis sa kalungsoran sa habagatang bahin sa Sugbo kabahin kini sa pagpahugot sa seguridad ilabi na sa mga tourist destinations bisan walay ‘specific threat’ nga adunay mga Abu Sayyaf nga mangidnap og mga turista sa maong lugar.

Usa ka emergency meeting sa Peace and Order Council ang gihimo diha sa Kapitolyo nga gitambongan nila ni  Chief Supt. Noli Taliño sa Police Regional Office  ug Gob. Hilario Davide III ug ubang opisyales sa Central Command.

Base sa assessment sa kapolisan malinawon bisan pa  sa terror advisory sa US Embassy sa Southern Cebu.

Ilaha hinuon girekomendar sa mga resort owners nga magkuha gyud og ilang mga gwardiya ug pagbutang og close-circuit television cameras.

Gisugyot usab ang pag-organisa sa mga mananagat ug mga molupyo ug ilhon gyud ang mga bag-ong mangabot sa ilang mga dapit.

Usa sa mga resort owners  nga si Teresita Araneta sa Dakong Bato sa Dalaguete nahadlok silang basin magpa-polis polis ra ang mga terorista aron sila makasud sa resorts.

Nasayran usab nga duna nay mga bookings sa mga turista nga nikanselar sa ilang pag-adto sa pipila ka resorts sukad sa nakalabay’ng semana.

Samtang si Gob. Hilario Davide III miawhag sa mga netizens nga dili magpataka og post og bisan unsa nga makapahulga sa mga turista.

Gusto usab ni Bise Gob. Agnes Magpale nga ipadayon sa kapolisan ang pagbutang og security checkpoints sa kadalanan.

Samtang ang Central Command mipakita sa mga nitambong sa maong tigom sa estilo sa mga Patikul-Sulu based Abu Sayyaf dihang ilang gisignit ang mga turista didto sa Las Palmas Resort sa Palawan ug sa Samal Island sa Davao.

Ang Sumilon Island maoy matud pa adunay access sa open sea sa tanang resorts sa habagatang bahin sa Sugbo. Apan ang Philippine Coast Guard, Philippine Navy ug Maritime Police aduna nay mga patrolboats nga gidestino sa maong dapit ug ingon man sa Dumaguete, Siquijor ug Bohol.

Matud pa sa CentCom, ang frontliners sa ASG mga mestisuhon ug maayong mamisti nga maoy mangamiga sa mga babayeng resort staff, mahimo silang magpakaaron-ingnong mananagat nga magpatobil apan diay mokidnap sila og turista. (/EIM)  (BANAT NEWS)