‘Santo Papa’ nanghatag og candy sa Carreta

CEBU, Philippines - Kung ang uban magsul-ob og makapanghadlok ug makalingaw sa kabataan, kagahapon sa buntag usa ka nag-inusarang batan-on ang nilibot sa sam-ang sa Carreta nga nagsul-ob og sapot sa Santo Papa samtang nanghatag og candy sa kabataan.

Ang batan-on nagpaila nga si Rogelio Herrero, hingkod, sakop sa usa ka religious group ug molupyo sa Barangay Basak Pardo, Dakbayan sa Sugbo.

Matud ni Herrero nga ang Adlaw sa mga Santos dili angay kahadlukan hinungdan nga nagsul-ob siya og senina sa Santo Papa aron ang mga Santos ang i-promote kay sa makahahadlok nga mga hulagway nga dili maayo sa mata sa kabataan.

Sumala pa ni Herrero nga unang higayon niyang nagpahigayon sa maong kalihukan diin daku sab niyang kalipay nga walay mga bata nga nangahadlok ug puno kini sa mga pagmaya.

Si Herrero niawhag sa katawhan nga mas maayo nga mag-senina og sapot sa Santos kay sa halloween costume nga makahatag og kahadlok sa kabataan.

Si Auxiliary Bishop Oscar Florencio, kura sa Sto. Rosario Parish, nahinangop sa gibuhat ni Herrero bisan wala siya personal nga nakaila niini tungod kay nagpakita kini sa usa ka ehemplo ilabi na sa pagsaulog sa Adlaw sa mga Santos.

Malaumon usab ang obispo nga dili himoon sa katawhan ang pagsapot og mga beste sa mga Santos kung himoon lang kini nilang panag-ingnan aron makakuwarta.

Maong kinahanglan gyud kining bantayan kanunay sa mga tanod ug kapolisan ilabi na sa mga sam-ang.