CEBU, Philippines - Human sa gihimong pakisusi sa Department of Education (DepEd) Cebu Province gikompirmar nila nga ilang sakop si Jeramil Sacil.
Si Sacil ang giingong magtutudlo nga nalakip sa gidakop sa raid sa City Anti-Illegal Drug Special Operations Task Group(CAIDSOT) sa Cebu City Police Office (CCPO).
Matud pa nga magtutudlo kini nga nadestino sa Kangdampas Elementary School sa District of Barili 1 sa Lungsod sa Barili.
Si Rhea Mar Angtud, Division Superintendent sa DepEd Cebu Province miingon nga nakadawat na siya og narrative report gikan kang Paterno Dandan ang District Supervisor District of Barili 1 human makakuha og police report.
Si Angtud nagkanayon nga ilang ipaabot ngadto sa ilang Regional Office alang sa pagpaubos sa maong magtutudlo sa imbestigasyong administratiba.
Kun mapamatud-an nga sad-an ang magtutudlo mag-atubang kini og silot sama sa pagkataktak sa serbisyo ug kanselasyon sa lisensiya.
Si Angtud subling niawhag sa mga school heads nga susihon pud ang kahimtang sa ilang mga magtutudlo kun wa ba sila magbisyo.
Iyaha usab giawhag ang mga magtutudlo nga dili kalimtan nga sila mga sumbanan sa kabataan. (BANAT NEWS)