CEBU, Philippines - Kusog nga linog mitay-og sa usa ka dakbayan sa Taiwan kagahapon sa kaadlawon ug gituohan nga daghan ang nangamatay, samtang ubay-ubay ang mga tawo nga natabonan sa nalusno nga mga building.
Daghang tag-as nga building ang nahugno ug nangatumba diha nga gitay-og ang Tainan City sa Magnitude 6.4 nga linog. Pasiuna nga report nga may lima dayon ka tawo nga napalgang patay.
Hangtod kagahapon sa udto, dul-an na sa 300 ka tawo, sagad mga samaron, ang naugkat gikan sa mga nahugno nga building. Mga sakyanan nangadugmok nga natam-okan sa dagkong semento.
Matud sa report nga daghan pa nga mga tawo ang gipangita pa gikan sa mga nahugno nga building. Usa ka hulagway nagpakita nga ang taas kaayong building natumba ug nababag sa karsada.
Ang mga bombero ug rescue workers nagtinabangay sa pagpangita sa mga tawo nga posible nga buhi pa sulod sa mga nahugno nga building.
Apil sa nahugno nga building mao ang usa ka care center alang sa mga bag-ong nahimugso nga bata ug ang ilang mga inahan. Nangatulog pa ang mga tawo nga nagpuyo sa condominium units diha nga miigo ang linog.
Usa ka Sugboanon nga si Gleceria Batulan, nagtrabaho isip manufacturing technician, misaysay nga nakahilak siya sa kahadlok diha nga gitay-og ang Tainan City sa linog.
Matud ni Batulan nga nakita gyud niya ang nagpangatagak nga kisame sa giukopahan nila nga building mao nga nagkapuliki siya pagpangita og katagoan.
“Salbahis man ko’g gamay, di ko kamao mag-ampo sama sa pag-ampo sa uban nga nindot kaayo pagka-storya bah, pero akong pag-ampo kanang sangpit g’yud ka’g maayo sa Ginoo gikan sa imong kasing-kasing g’yud nga mora ra’g nakigstorya bitaw, unya naghilak ka ba,” matud ni Batulan.
Naamgohan ni Batulan nga gamhanan g’yud diay kaayo ang pag-ampo ug maayo na lang kay mao g’yud kadto ang unang nasulod sa iyang huna-huna. (BANAT NEWS)