CEBU, Philippines - Wala’y trabaho sa mga opisina sa Kapitolyo tibuok adlaw ugma nunot sa Misa sa International Eucharistic Congress (IEC) nga ipahigayon sa atubangan nga bahin.
Kini aron paghatag og igo’ng luna sa mga tigpasiugda sa IEC nga makaandam sa lugar ug paghatag og higayon sa mga kawani sa Kapitolyo nga makatambong sa kalihukan.
Matud sa tigpamaba sa Kapitolyo, Ethel Natera, nga mohatag sila og advisory sa ubang buhatan nga anaa sulod sa compound sa Kapitolyo aron masayud sa kalihukan.
Kini naglangkub sa Provincial Prosecutor’s Office, Commission on Elections, Department of Agrarian Reform ug Department of Interior and Local Government-Cebu nga dili ubos sa kagamhanan sa probinsiya.
Dugang ni Natera nga ang mao’ng mga ahensiya ang magbuot kung unsa’y ila’ng desisyon. Higpit nga seguridad ang ipatuman sa Kapitolyo nunot sa mao’ng Misa sa IEC alas 4:00 sa hapon apan kadlawon pa lang sa mao’ng adlaw siraduhon na ang kadalanan nga nagpalibot. Matud ni Natera nga kinahanglan sila mosubay sa lagda sa security sa IEC.
Iya’ng giklaro nga ang physical arrangement sa Misa ila na sa organizers ug ang obligasyon sa Kapitolyo mao lang ang paghatag og lugar nga mapunduhan ug mailisan sa mga Obispo.
Gibutyag ni Natera nga ang pagbutang og mga medical stations sa Provincial Disaster Risk Reduction and Management Office gipaagi usab sa IEC organizers. (BANAT NEWS)