CEBU, Philippines – Usa ka gidudahang drug den diha sa Sitio Tapon, Barangay South Poblacion sa Lungsod sa San Fernando ang gironda sa mga sakop sa National Bureau of Investigation -7 kagahapon sa hapon.
Ang target sa operasyon mao si Gringo Maalyao, 28, kinsa nadakpan dayon human kini napalitan og ilegal nga drugas sa mga ahente sa NBI.Apil sa nasikop ang igsuon niini nga si Crisologo Maalyao, 26, kinsa giingong maoy iyang partner sa negosyo sa ilegal nga drugas.
Sumala pa sa NBI, ang dapit nga gironda adunay buwagbuwag nga mga payag, dunay payag diin adto lang makakuha og drug paraphernalia, sa laing payag usab kini bayran apil na ang shabu nga suyupon.
Apan sa laing payag usab kini suyopon nga maoy nagsilbing drug den alang sa mga manuyopay.
Ang operasyon gipangulohan ni Special Agent Arnel Apura.
Matud ni Gringo, di pa lang siya dugay sa maong bisyo unya ang kalisod maoy nagtukmod niya para mosulod sa illegal nga binuhatan.
Sumala pa nga adunay reklamo gikan sa magtutudlo sa usa sa mga tunghaan sa lungsod kay ang iyang mga tinun-an matud pa dili na mobalik sa eskuylahan kay nanuyop na sa lugar.
Gi-surveillance ang area ug gipasudlan og tawo sa NBI diin duha ka higayon nga nag test buy nga gihimo nga pulos nagpositibo.
Tungod niini, gihimo ang operasyon apan sa wala pa kini sugdi subling gipalitan og shabu ang mga suspek ug nakapalit gihapon ang NBI kanila. Ang subject sa buy-bust operation nga si Gringo gihulagway nga matud pa ‘untouchable’ sa ilang lugar kay giingong adunay polis nga sakop sa San Fernando Police Station ang nagprotektar kaniya.
Apan ang maong si Gringo dihang gipangutana bahin niini kusganong mihimakak sa alegasyon. Gawas sa binulto nga mga shabu nga gibanabanang dul-an P1 ka milyon nakakuha usab ang NBI og lima ka armas ug duha ka ski-mask sa u-box sa motor sa suspek maong ilaha kining susihon sa pamasin nga nalambigit siya sa gun for hire business.
Ang mga nagkalain-laing klase sa armas nga nakuha ipaubos usab sa ballistic examination aron pagsusi kun gigamit kini sa krimen sama sa pusil diha sa Carcar, Naga ug mismo sa San Fernando.
Si Chief Insp. Richard Gadingan, hepe sa San Fernando Police miingon nga nakadawat na sila sa impormasyon sa maong mga suspek ug ilaha usab gisubay ang report nga polis ang protector sa duha. – /EIM) (BANAT NEWS)