CEBU, Philippines - Nidangop kang Talisay City Mayor Johnny de los Reyes ang lalaki’ng nipasangil nga gikulata ni Konsehal Eduardo Gullas III niadto’ng Domingo sa gabii atol sa Sinulog sa pizza outlet sa Capitol Site.
Uban sa iya’ng tulo ka amigo nga testigos, si Ralph Gemini Abadilla, 34, ang niatubang sa mayor ug nangayo og tambag.
Si Abadilla ang kusganong nibarug sa iya’ng pamahayag ug nipasangil sa kampo ni Gullas nga gibali ang estorya.
Matud niya nga gibati na siya lakip ang iya’ng pamilya og kahadlok tungod kay ang mga Gullas mga prominente ug impluwensiyado’ng tawo.
Si delos Reyes nagdumili sa pagpa-interbyu kay nahadlok nga masaypan siya nga namolitika sa mao’ng hitabo.
Ang anak sa mayor nga si City Administrator John Yre delos Reyes ang nag-post sa iya’ng Facebook labot sa hitabo.
Samtang giklaro sa kapolisan sa Fuente Police Station nga wala sila’y gipaboran sa grupo ni Gullas ug Abadilla.
Kini ang gipasabot ni Police Officer 3 Clifford Manogura, desk officer sa Fuente Police Station ug duty desk officer atol sa pagpa-blotter sa duha ka grupo sa managlahi nga oras.
Gihimakak ni Manogura nga ila’ng gitagoan ang police blotter aron maka-una og file og police report ang grupo ni Gullas.
Hinoon gipasabot niini nga nalangay niya og hatag ang gipangayo nga police report ni Abadilla sanglit tayming sab nga daghang langyaw ang nangayo og police report aron makakuha og insurance. (BANAT NEWS)