Nakuryentehan sa skywalk namatay gyud

CEBU, Philippines – Nakabsan gyud sa iya’ng kinabuhi ang 32-anyos nga nakuryentehan sa atop sa skywalk sa may Osmeña Boulevard duol sa Fuente Osmeña Rotunda.

Ang hepe sa Homicide Section sa Cebu City Police Office, Senior Insp. Elisandro Quijano, nipahibawo nga alas 12:57 sa nakalabay nga kadlawon nakabsan sa kinabuhi sulod sa Intensive Care Unit (ICU) si Noli Laborte Seciban. Kini gumikan sa grabe’ng paso agi sa kusog nga boltahe sa kuryente nga naangkon sa biktima. Alang ni Quijano, ang Visayan Electric Company ang manubag sa mao’ng hitabo kung mosang-at og reklamo ang pamilya sa namatay.

Si Cesiban, taga Sitio Tabay Lawom, Barangay Tisa, Dakbayan sa Sugbo, nakuryentehan human nanguha sa tarpaulin sa atop sa skywalk nga gidayandayan sa Sinulog.

Matud ni Senior Police Officer 4 Rogelio Cañete, imbestigador sa Homicide Section sa CCPO, nga ang wire nga nakakuryente sa biktima mao sab ang nakakuryente sa duha ka bata nga namatay sa nakalabay nga semana.

Samtang pakigkitaan ni acting Mayor Edgardo Labella ang Sinulog Foundation, Inc. ug ang VECO aron tukion ang hitabo ug malikayan nga masubli pa. Buot ni Labella nga ma-imbestigar ang panghitabo ug gimanduan niya ang Office of the Building Official sa pagsusi sa mga establisemento ug flyover ug makig-alayon sa VECO sa pagpanghipos ug pag-ayo sa mga wires nga delikado ang nahimutangan.

Tug-an sab ni Labella nga hatagan og hinabang ang pamilya sa nakuryentehan pinaagi sa Department of Social Welfare and Services (DSWS). – /GMR) (BANAT NEWS)