CEBU, Philippines - Mokabat og kapin 3.2 milyones ka tawo ang nagdasok sa kadalanan sa Dakbayan sa Sugbo atol sa pista sa Senyor Sto. Niño ug sa paglusad sa Sinulog Grand Parade kagahapong adlawa.
Gibanabana ni Police Regional Office-7 director Chief Superintendent Manuel Gaerlan nga mokabat og 3 milyones ang gidaghanon sa mga tawo pasado alas-3 kagahapon sa hapon.
Nianang pagkilom-kilom, ang tigpamaba sa PRO7 nga si Sr.Supt. Renato Dugan mipahibalo nga miabot na og 3.2 milyones ang mga tawo diha sa kadalanan.
Niadtong Sabado, ang kapolisan mibanabana nga mokabat duha ka milyones ka tawo ang niduyog sa Fluvial Procession ug Solemn Procession.
Hinuon bisan sa kapin 4 mil ka mga polis ug force multipliers nga gi-deploy alang sa seguridad adunay trese ka mga kaso sa pagpanguot ang natala, diin napulo kanila mga langyaw sumala pa sa FB post sa dyLA.
Samtang nasayran nga duha usab ka sakop sa media ang nakuotan diha sa carousel route.
Aduna say kaso sa pagpanglungkab sa usa ka appliance center sa Brgy. Sto. Niño ug adunay nahitabong pagpanulis sa usa ka pawnshop and money remittance center sa Brgy. Pusok sa Dakbayan sa Lapu-Lapu kagahapon sa udto.
Si Senior Superintendent Armando Radoc, acting chief sa Lapu-Lapu City Police Office mitug-an sa Banat News nga padayon ilang imbestigasyon kay nahibulong sila kun nganong yanong gipasulod sa assistant manager ang tulo ka tawo nga giingong nagsuot og uniporme sa ilang kompanya nga nagpailang audit team.
Gitan-aw usab sa kapolisan nganong daling naabli ang combination number lock sa vault ilabi na ang pag-off sa main switch sa suga sa pagdeklarar og hold-up sa mga tulisan. Nasayran usab nga way gwardiya ang maong kompanya.
Apan bisan paman sa hitabo generally peaceful ang kalihokan sa Sinulog kay wala maapektahi sa maong mga ginagmay nga krimen, dugang pasabot ni Gaerlan.
Samtang adunay usa ka lalaki ang gitabang human nagisian sa iyang kilay dihang nasikhan kini sa laing nagtan-aw sa Sinulog Grand Parade tungod sa gipailog nga bola gikan sa mga tawong sakay sa float sa usa ka money remittance company.
Ang pagpanghatag og giveaways sa mga misalmot nga float ang una nang gibawal sa kapulisan. - /EIM (BANAT NEWS)