CEBU, Philippines - Gisugdan na ang pagpatuman sa Commission on Elections sa Dakbayan sa Toledo ang election gun ban kagahapong adlawa.
Kini ang gitug-an ni City Election Officer, Atty. Michael Angelo Sarno.
Subay niini nipasidaan si Sarno ngadto sa mga adunay armas nga dili mahimo’ng magdala sa ila’ng armas kun anaa gawas sa ila’ng panimalay. Kini gawas lang niadto’ng nakakuha og special permit sa Comelec.
Exempted sa gun ban ang Armed Forces of the Philippines, Philippine National Police ug ubang law enforcement agencies sa gobiyerno. Gi-exempt usab sa Comelec ang mga security guards apan dili nila pwede’ng dalhon ang service firearms gawas sa ila’ng buhatan ug panimalay lakip na sa mga bala.
Nagkanayon si Sarno nga mag-atubang gyud og kaso’ng kalapasan sa Comelec gun ban ug dugang kaso ang posible’ng mapasaka batok sa makalapas sa balaud. (BANAT NEWS)