CEBU, Philippines – Adunay 50 ka bata nga dili taga Sugbo ang moapil sa grupo nga mohimo og una nga pagpangalawat atol sa ipahigayong 51st International Eucharistic Congress (IEC) adto sa Cebu City Sports Center unya Enero 28 sa hapon.
Si Padre Carmelo Diola, ang gitahasan sa Archdiocese of Cebu sa pagpangita og mga bata nga makasalmot sa unang pagpangalawat, nga 12 ka grupo ang gitahasan paghatag og katekismo ug mo-recruit sa mga batang libudsuroy aron moabot og 500 ka bata ang makaapil isip 1st communicants.
Matud ni Diola nga ilang gipaabot karon ang mga bata nga gikan sa Tacloban, Calbayog ug Digos City sa Davao nga makaapil sa umaabot nga kalihukan ug paghimo sa unang pagpangalawat.
Gibutyag ni Diola nga usa ka dakong hagit kanila ang pagpangita sa 500 ka batang libudsuroy tungod kay daghan sa maong grupo ang wala magtungha ug walay mga records nga diin ang mga grupo nga ilang gimugna mao pa ang naglihok alang sa mga panginahanglan.
Malaumon hinoon si Diola nga moabot og 500 ka bata ang ilang matigom sa wala pa ang adlaw sa pagpahigayon sa International Eucharistic Congress. (BANAT NEWS)