Babaye, lalaki nagsuyop sikop

CEBU, Philippines – Nasikop sa kapolisan ang babaye ug lalaki nga naaktohan nga nagsuyop og shabu sulod sa ila’ng panimalay sa Sitio Orel, Barangay Banilad, Dakbayan sa Mandaue alas 11 pasado sa niagi’ng gabii.

Si Police Officer 2 Oliver Gipanao sa Presinto 4 sa Mandaue City Police Office (MCPO) niila sa duha nga nadakpan nga sila si Cherry Lubrica, 23, ug Armando Cobarde, hingkod, pulos nagpuyo sa mao’ng dapit.

Matud ni Gipanao nga nakadawat sila og taho sa pipila ka nagpakabana nga molupyo sa mao’ng dapit labot sa nagsuyop og shabu nga ila’ng silingan.

Dali nga nihimo og pakisusi ang ila’ng mga kauban nga gilangkuban nila ni PO1 Juanito Libres ug PO1 Abjie Villaester.

Sa ila’ng paghidangat sa mao’ng dapit mao’y ila’ng naaktohan ang duha nga nagsuyop og shabu. Nunot sa ila’ng pagkasikop, nasakmit ni Libres ang duha ka gagmay nga pakete sa shabu ug mga drug paraphernalia isip ebidensiya sa kaso nga ipasaka batok sa duha ka dinakpan. – /GMR) (BANAT NEWS)