CEBU, Philippines – Magpadayon ang kampanya sa kapolisan sa Dakbayan sa Lapu-Lapu batok ilegal nga pabuto hangtud sa bisperas sa pagsugat sa Bag-ong Tuig.
Kini ang gitataw ni Senior Superintendent Armando Radoc, acting director sa Lapu-Lapu City Police Office, human ila’ng gisugdan ang pagpatrolya niadto pang Disyembre 24 sa alas 7 sa gabii.
Ang pagpatrolya niresulta sa pagkasakmit sa lima ka sakong ilegal nga pabuto nga kantidad og P10,000 gikan sa Barangay Pajac ug Babag.
Dugang ni Radoc nga ang mao’ng operasyon gibuhat sa duha ka police station sa dakbayan gawas sa LCPO Headquarters. Nagkanayon si Radoc nga ang raid gisugdan human nakadawat ang LCPO og reklamo nga adunay manghimoay og pabuto gawas sa Barangay Babag.
Sa pakisusi ni Radoc, wala’y permit ang mga stalls sa duha ka barangay ug posible’ng wala kini nag-agi og inspeksyon sa polis ug sa fire district sa siyudad. Ang mga nasakmit nga pabuto gipanghumol sa usa ka ice box nga puno og tubig.
Pahimangno ni Radoc sa publiko nga kung mopalit og pabuto, didto lang mopalit sa mga legal ug lisensyado’ng stalls sa Barangay Babag. Aron maluwas sa mga aksidente sa pabuto, abiso ni Radoc nga dili sab pwede ipaduol ang mga pabuto sa mga bata. Sa pagkakaron, wala’y nadawat nga report sa mga nangaangol sa pabuto ang Lapu-Lapu City Hospital. – /GMR) (BANAT NEWS)