CEBU, Philippines – Patay ang backrider sa usa ka motor samtang angol ang drayber niini human sila nadumbolan sa usa ka truck samtang nagbiyahe sa Barangay Poblacion I, Carcar City kaniadtong gabii sa bisperas sa Pasko.
Ang namatay mao si Jhonrey Cinco, 13, nga igsoon ra sab sa naangol nga drayber nga mao si Renato, 30, taga Poblacion III, Carcar City.
Gitanggong sa Carcar City Police Station si Alex Saulga, 32, taga Cansaga, Consolacion nga maoy drayber sa trak nga nakabangga. Ang mga biktima nagsakay sa ilang motor ug nagsunod kanila ang trak de karga paingon sa lungsod sa Barili.
Samtang, gibilanggo karon sa Presinto 2 sa Mandaue City Police Office (MCPO) ang usa ka Korean national nga nakadumbol og motorsiklo didto sa dalan M.C. Briones, Barangay Tipolo, dakbayan sa Mandaue kaniadtong Pasko sa gabii.
Duha ka tawo nga sakay sa motorsiklo nangaangol ug dali kini nga gidala sa ospital. Sila mao si Renila Araña, 55, ug Angela Francisco, 18, nga taga Villa Leyson Subdivision, sakop sa Barangay Bacayan, dakbayan sa Sugbo. Si Gukro Yun, 34, nagpuyo sa Cebu City Lights Condominium sa Barangay Apas, pabiling gitanggong sa kapolisan samtang giandam pa ang tukmang kaso nga ipasaka sa hukmanan.
Matud ni PO2 Soberano Tradio sa traffic division sa Mandaue City Police Office (MCPO) nga nagdagan padulong sa dakbayan sa Sugbo ang Koreano ug nadumbolan niya ang motorsiklo sa pagliko niya sa eskina M.C. Briones sa Barangay Tipolo. (BANAT NEWS)