CEBU, Philippines – Dili mominus sa P90 mil nga kwarta ug mga alahas ang nakuha sa kawatan sa kwarto sa magsuon nga nagpuyo sa usa ka condominium sa Barangay Kamputhaw, Dakbayan sa Sugbo sa niagi’ng gabii.
Dali nga nagpatabang sa kapolisan ang managsuon nga si Rollie Ann Rebusit, 25, ug Maria Rose Rebusit, 28, human ila’ng nasayran niadto’ng niagi’ng gabii nga wala na ang ila’ng mga gamit ug kwarta sulod sa kwarto.
Dali nga gisusi sa taga Theft and Robbery Section sa Cebu City Police Office ug nasayran nga giguba sa kawatan ang pultahan sa kwarto sa mga biktima.
Lakip sa mga nakuha ang usa ka Italian gold bracelet nga tag P40, 800; singsing nga tag P20 mil, laing usa ka gold bracelet nga tag P10 mil, usa ka gold necklace nga tag P12 mil, branded nga sapatos nga tag P5 mil ug kwarta nga P2,500.
Gisubay sa kapolisan kung giunsa pagsulod sa kawatan sa mao’ng building tungod kay sa ikapito nga andana ang kwarto sa mga Rebusit.
Gisuwayan sab sa kapolisan kung adunay closed-circuit television (CCTV) camera ang condominium nga posible’ng nakakuha sa krimen.
Samtang usa ka batan-ong lalaki ang gidakop mismo sa biktima human kini nasakpan nga nangawat og cellphone sa Tabay-Lawom, Barangay Tisa niadto’ng nakalabay nga kadlawon. Ang 18-anyos nga si John Carby Aratia gi-turnover sa biktima nga si Julius James Baculi, 21, ngadto sa kapolisan human iya’ng nasakpan ang pagkuha gyud sa batan-on sa iya’ng Samsung nga cellphone gikan sa iya’ng bag. Si Aratia naa na karon sa Punta Princesa Police Station ug mag-atubang og kaso sa pagpangawat. – /GMR) (BANAT NEWS)