CEBU, Philippines – Ang provincial treasury nakakuha na og 96 porsiyento sa buwan sa Oktubre sa ilang target collection nga P2.715 bilyones niining tuiga matud pa ni Provincial treasurer, Emmanuel Guial ug nagtuo siya nga molapas sila sa ilang target karong tuiga.
Matud ni Guial nga ang ilang target income niining tuiga P2.859 bilyones lakip na unta niini ang halin sa luna diha sa Maria Luisa Subdivision sa Barangay Banilad, dakbayan sa Sugbo nga P144 milyones.
Apan tungod sa mga rekisitos sa Commission on Audit dili pa mabaligya ang maong luna niining tuiga.
Base sa talaan sa provincial treasury gikan sa buwan sa Enero hangtud sa Oktubre niining tuiga mikabat sa P123,408,535 o100.77 porsiyento ang nakolektang buhis sa amusement tax; franchise tax; professional tax; property transfer tax; real property tax; tax on delivery trucks and vans; tax on SAG and other quarry products; other local taxes ug sa fines and penalties.
Sa maong local internal sources ang probinsiya duna lang kini P122,408,535 nga target collection.
Sa non-tax receipts mikabat sa P45,743,864.26 o 82.93 porsiyento ang nakolekta diin ang ilang target niini P55,158,000. Ang non-tax receipts gilangkuban sa regulatory fees; business and services income ug other income receipts.
Sa Cebu South Bus Terminal ang probinsiya duna kini nakolekta nga abot nga P55,532,878.77 o 90.13 porsiyento sa P61,617,000 nga target.
Sa development fund ubos niini ang external source nga mao ang IRA ang probinsiya dunay nadawat nga P385,809, 655.80 o 83.40 porsiyento sa P462,600,000 nga target.
Sa district hospitals mikabat sa P150,455,815.32 o 96.36 porsiyento sa P61,617,000 sa target collection.
Sa laing bahin, ang probinsiya sa Sugbo giila sa regional office sa Bureau of Local Government Finance (BLGF) isip top performer nga local government unit sa revenue collection ug assessment operations sa tuig 2014.
Niadtong Hunyo, 2015 ang BLGF-7 nagpahigayon og performance evaluation sa local treasurer’s ug assessors sa upat ka probinsiya, 16 cities ug 116 municipalities sa Central Visayas. Ang Cebu province dunay average nga 39.61 porsiyento growth rate sa revenue collection ug nag-una kini sa ilang standing sa rehiyon.
Ang Cebu province namentinar niini ang padayong pagsaka sa collection sa real property tax and charges sa tuig 2013-2014. Sa tuig 2014 mikabat sa 10.01 porsiyento ang increased growth sa collection sa real property tax; sa business tax misaka kini ngadto sa 24.88 porsiyento; ang collection sa fess ug charges misaka ngadto sa 503.81 porsiyento ug 13.26 porsiyento ang saka sa economic enterprise. (BANAT NEWS)