Onyok nakasulod na sa nasud
CEBU, Philippines - Gipaabot nga masinati ang uwan ugma hangtud sa Domingo sa Kabisay-an ug Mindanao nunot sa pagsulod sa bagyo’ng Onyok.
Human nikusokuso sa Luzon ang bagyo’ng Nona, nakasulod na sa Philippine Area of Responsibility ang bagyo’ng Onyok nga anaa na sa Mindanao.
Hinuon anaa lang kini sa category nga tropical depression nga dunay gikusgon sa hangin nga 55-kilometros matag takna sa iya’ng sentro.
Gipanglantawan nga bisan sa iya’ng kahinay magdala kini og panagsa’ng pag-uwan.
Base sa weather forecast sa PAGASA, karong Sabado kini posible’ng mo-landfall sa Katipunan, Zamboanga del Norte ug sa iya unya’ng pag-landfall gipanglantawan nga mas mohinay kini ug mahilis sa tabang sa hanging amihan.
Samtang ang bagyo’ng Nona gikan sa typhoon nihinay kini ngadto sa usa ka tropical depression nga adunay gikusgon sa hangin nga kapin 50-kilometros matag oras.
Mao usab kini ang nagdala og mga pag-uwan sa Luzon area.
Gipanglantawan nga kini mogawas sa PAR ugma sa buntag.
Gawas sa duha ka bagyo, wala na’y nasigpatan ang PAGASA nga laing bagyo nga posible’ng magdala og mga pag-uwan sa sunod semana atol sa pagsaulog sa Pasko. (BANAT NEWS)
- Latest
