CEBU, Philippines - Malinawon ang unang adlaw sa Misa de Gallo nga gipahigayon sa tibuok simbahang katoliko dinhi sa Sugbo kagahapon sa buntag sumala pa sa kadagkoan sa kapolisan ug simbahan.
Si Senior Superintendent Rey Lyndon Lawas, sa Police Regional Office-7 miingon nga “generally peaceful” ang unang adlaw sa pagpahigayon sa Misa de Gallo sa nagkadaiyang mga simbahan sa tibuok rehiyon.
Matud pa niya, walay mga report nga kasamok silang nadawat nga makonsiderar nga nakapahunong sa maong relihiyosong kalihokan ilabi na gikan sa mga dagkong siyudad.
Samtang si Atty. Rey Gealon, executive director sa Cebu City Transportation Office miingon nga bisan midagsa ang mga tawo nga adunay mga sakyanan wala sila makasinati og problema sa trapiko.
Si Fr. Roger Bag-ao, SVD, University Chaplain sa University of San Carlos, nibutyag atol sa iyang Homiliya sa Santos nga Misa nga iyang gihimo diha sa St. Arnold Janseen Chapel, USC –Talamban Campus, mas maayo nga mahimo kitang iwag ngadto sa tanang mga tawo nga naa sa kalisod, kasubo ug nanginahanglan nga sila makakita pa og paglaum.
Gipadayag ni Bag-ao ang paghimo sa sakto ug matarong maoy mga pamaagi nga makahatag ang tawo og kahayag ug paglaum ngadto sa iyang isig-kaingon.
Human sa Santos nga Misa gibendisyonan ang mga tinun-an gikan sa elementarya ngadto sa kolehiyo nga gikan sa nagkadaiyang simbahan nga nitambong sa maong Santos nga Misa.
Atol sa pagbukas sa unang adlaw sa Misa de Gallo, gisaulog usab sa tibuok simbahang katoliko ang National Youth Day, adlaw sa tanang mga kabatan-onan.
Dinhi sa Archdiocese of Cebu gipahigayon sa Commission on Youth ang Youth Ministry Awareness week subay sa National Youth Day nga diin mga nagkadaiyang kalihukan ang gipangandaman. (BANAT NEWS)