CEBU, Philippines - Hapit nagkabuwag sila si Talisay City Mayor Johnny V. de los Reyes ug runningmate nga si Konsehal Dennis Basillote human sila wala nagkasinabot labot sa pagtudlo og konsehal sa Barangay Dumlog nga ihulip sa namatay.
Kasaligang tinubdan sa Banat News nipahibawo nga niadto’ng Miyerkules, si Basillote nihangyo ni Mayor JVR nga ihulip si Eda Cabusas kang anhing Anthony Villaver.
Apan si JVR nipahibawo ni Basillote nga naka-una na si Monnette Rabaya-Yu sa paghangyo kaniya nga aduna sab siya’y pasudlon nga tawo nga mohulip ni Villaver.
Kini ang hinungdan nga nahitabo ang sinukliay og pulong nga niresulta sa pagpahibawo ni Basillote nga magbuwag na lang sila.
Gani naapiki pa ang kandidatura sa anak ni Basillote nga si Rex nga modagan sa pagka-konsehal sa siyudad.
Gani niabot pa sa punto nga gi-uli ni Basillote ang giingong T-shirt nga hinatag ni JVR aron gamiton sa kampanya.
Apan si Basillote niklaro nga adunay tawo nga nihatag kanila og T-shirts ug ila’ng gitunga ni JVR.
Si JVR giingong nipatawag og emergency meeting ug pipila ka oras ang nilabay nahilot ra ang kasungian ug ang gusto ni Basillote ang natuman.
Nasayran nga si Kapitan Nelson Abellana sa Dumlog ang sakop sa Alayon Party nga iya ni kanhi kongresista Eduardo Gullas.
Si Basillote niingon nga ang gahum sa pagtudlo kun si kinsa ang ihulip anaa man sa mayor. (BANAT NEWS)