SM wa kahibawo mga kahoy nahanaw

CEBU, Philippines – Gihimakak sa kadagkuan sa SM Seaside City ang alegasyon nga matud pa duna sila’y gitangtang nga lima ka punoan sa Narra sa sidewalk sa mall nga bag-o lang nagbukas niadto’ng Nobiyembre 27.

Matud sa project manager, Gerald Gozum, nasurpresa siya sa kalit nga pagkahanaw sa lima ka punoan sa Narra.

Gitubag ni Gozum ang suwat ni Community Environment and Natural Resources Office (CENRO) Cebu City chief Raul Pasoc labot niini.

Matud niya nga ang mao’ng mga kahoy wala na igkita human sa opening sa mall.

Hinuon nimando na si Gozum sa pagpaimbestigar niini.

Ang tadumala sa SM Seaside City ni-apply og permit alang sa earth-balling activity sa lima ka kahoy duol sa establesemento.

Apan ang tigpamaba sa Department of Environment and Natural Resources-7, Eddie Llamedo, niingon nga ang SM Seaside City mahimo lang makabalhin og duha ka punoan nga adunay 15 centimeters nga diameter.

Gihimug-atan ni Gozum nga wala’y kamanduan nga tangtangon ang mao’ng mga kahoy.

Apan asoy ni Llamedo nga imposible alang niadto’ng mga kahoy nga mawala nga wala makahibawo si Gozum lakip ang mga tawo niini.

Matud ni Llamedo nga subay sa rekomendasyon ni Pasoc, ang DENR-7 Legal Division nag-andam na og kiha batok sa contractors sa SM Seaside City sa kalapasan sa Presidential Decree 705 nga nagdili sa pagtangtang sa mga kahoy.  (BANAT NEWS)