CEBU, Philippines - Gidakop sa mga sakop sa City Environment and Natural Resources Office (CENRO) sa Dakbayan sa Mandaue ang pito ka dump truck nga nagkarga og basura nga ilabay sa illegal dumping area nga pribadong luna sa Sitio Tambis, Barangay Umapad.
Si Placido Jerusalem, officer in-charge sa CENRO, nga nahinabi sa Banat News niingon nga gipanag-iya sa mga pribado’ng tighakot og basura ang mga dump trucks nga gidakop tungod kay wala’y environmental compliance certificate (ECC) ug wala usab kini mokuha og sanitary permit sa dakbayan.
Matud ni Jerusalem nga gikan sa nagkalainlaing pabrika sa dakbayan ang mga basura nga gikarga ug ang pipila niini gikan usab sa Dakbayan sa Sugbo.
Gitataw ni Jerusalem nga ang maong mga basura nga nagsagol gikan sa mga biya sa pabrika o gikan sa mga dagkong tindahan nga nangontrata sa paghakot ug paglabay og mga basura.
Dugang ni Jerusalem nga pribado ang luna sa Umapad nga gihimo’ng labayanan sa mga basura nga wala usab kini mokuha og pagtugot gikan sa kagamhanan sa dakbayan ug sa Department of Environment and Natural Resources.
Giangkon ni Jerusalem nga gipangita nila ang tag-iya sa luna nga gihimong dumping area apan wala gyud nila igkita ang nahimutangan aron unta mabadlong.
“Maayo man to nga atong mailhan aron atong mademanda,” matud ni Jerusalem. Gumikan niini giatangan na lang sa CENRO ang mga mohatud sa basura ug pabayron og P6,000 nga multa. (BANAT NEWS)