CEBU, Philippines - Nawagtang na ang Never Again billboard sa South Road Properties (SRP) habig sa Barangay Tanke, Siyudad sa Talisay human sa usa ka adlaw nga kini gimuntar niadto’ng Lunes.
Sama sa pagbutang niini, wala usab nabantayi ang pagtangtang niini.
Matud ni Bise Mayor Romeo Villarante nga base sa sentimento sa katawhan sa Talisay, nakahimo kini og bati nga impression kang Gobernador Hilario Davide III.
Sigun pa niya nga bisan wala gibutang sa billboard apan ang katawhan nagtuo nga grupo ni Davide ang nagbutang niini.
Matud niya nga maayo nga gitangtang ang billboard kay nibomerang kini sa namunoan sa Kapitolyo.
Gipasabot ni Villarante nga ang isyu sa Balili property iya ni kanhi gobernador Gwendolyn Garcia ug dili kang kanhi bokal Winston Garcia nga mao’y kaatbang ni Davide.
Ang Never Again billboard una nga gibutang sa Cebu International Convention Center (CICC) sa Dakbayan sa Mandaue nga proyekto usab ni Gwen apan gitangtang kini human sa pipila ka adlaw. (BANAT NEWS)