Eskrima misuway pagkulit og pangalan sa Guinness

CEBU, Philippines - Malampuson nga napahigayon dinhi sa Dakbayan sa Sugbo ang suway nga pagkulit og pangalan sa Guinness Book of World  Records (GBWR) sa adunay kinadaghanan og partisipante nga nagtuon og Eskima o Arnis sa usa ka klasehan.

Apan bisan way nitambong nga opisyales sa GBWR atol sa kalihokan nga gihimo diha sa Cebu City Sports Complex kagahapon, gipasalig ni Edward Hayco sa Cebu City Sports Commission nga nisubay man sila sa estrikto nga documentation subay sa standards niini.

Singko mil ka mga batang nagpangidaron gikan 8-anyos ngadto na sa 20- anyos gikan sa nagkadaiyang eskuylahan sa Cebu City, Mandaue ug Lapu-Lapu ang mipakita sa ilang abilidad sa Arnis kagahapon sa hapon.

Gawas sa mga tinun-an aduna pay lima ka mga Person with Disabilities nga naka-wheelchair ang niapil.

Gipasabot ni Hayco nga dili pagbuak sa record ang gihimo sa Sugbo kondili pagpahibalo lamang nga dinhi nagsugod sa Sugbu ang arnis ug sa unang higayon masaksihan sa tibuok kalibutan ang pag-ensayo sa liboan ka kabataan ug mohagit sa ubang mga kanasuran aron pagtuon niini.

Gibutyag ni Hayco tanang niapil sa maong kalihukan miboluntaryo sa pagsalmot tungod sa ilang gugma sa Arnis.

Kun palaron ug dawaton sa GBWR ang dokumentong iduso sa CCSC, madugang kini sa mga gihuptang record sa Sugbo sama sa labing daghan niapil sa Dancesport, Chess ug Archery. Si Starlette Jade Pestaño, tinun-an sa Cebu Normal University ug usa sa mga volunteer sa Arnis nalipay nga nakatampo siya sa pagkulit og record sa kasaysayan sa Sugbo. (BANAT NEWS)