P13.5M gigahin sa Midwest tourism
CEBU, Philippines - Nigahin og P13.5 milyones ang kagamhanan sa Probinsiya sa Sugbo alang sa inprastraktura nga tukuron sa mga tourist destinations sa kalungsuran sa Midwest sunod tuig.
Ang mga lungsod sa Midwest gilangkuban sa Alegria, Aloguinsan, Asturias, Balamban ug Tabuelan.
Ang plano lakip sa gituki sa gipahigayong last quarter meeting sa Cebu Investment Promotion Board sa nilabay’ng semana.
Si Gobernador Hilario Davide III ug Bise Gobernador Agnes Magpale nitambong sa mao’ng meeting.
Si Benjamin Yap, pangulo sa Cebu Investment Promotion Office, nagkanayon nga ang budget sa mga proyekto gilakip kini sa 2016 Annual Investment Plan.
Ang mga local government units kinahanglan nga mopresentar sa Cebu Tourism Council sa ila’ng detailed engineering plans ug program of works karong Enero.
Matud ni Yap nga ang proyekto gikatakdang ilusad sa buwan sa Marso sunod tuig kung matapos na ang tanang training-workshops kabahin sa eco-tourism.
Ang training-workshops gipanguluhan ni Joselito “Boboi” Costas, Capitol consultant sa Midwest tourism.
Ang mga LGU gi-require sa pagduso sa ila’ng eco-tourism management plan ug business plans. Ang mga tourist spots sa nahisgutang mga lugar na-assessed na usab.
Ubang proyekto nga gisugyot sa mga LGUs naglangkub usab sa road openings, footbridges, footwalks, viewing decks, pansayan, cottages, water systems ug tourist information areas. (BANAT NEWS)
- Latest
