CEBU, Philippines - Nisurender na lang ang konseho sa Dakbayan sa Talisay ug aprobahan nila ang ika-upat nga supplemental budget nga gipangayo ni Mayor Johnny de los Reyes (JVR).
Kini human padayon nga nagmagahi si JVR sa pagbalik sa ila’ng mga job order workers nga 88 kabuok nga bahinon sa 10 ka konsehal ug ni Bise Mayor Romeo Villarante.
Giingong nagkauyon ang duha ka habig nga ipasar ang supplemental budget ubos sa kondisyon nga ibalik sa mayor ang ila’ng mga job order workers. Kapin 700 ka job order workers ang maswelduhan kun ang P74 milyones nga supplemental budget maaprobahan.
Naglangkub ang mao’ng budget sa kapin P9 milyones nga isweldo sa job order workers ug mga magtutudlo sa Talisay City College, P40 milyones nga infrastructure projects ug P4.9 milyones nga intelligence fund.
Si Villarante nibutyag nga karong Martes ila’ng ipalabang ang supplemental budget.
Iya’ng giklaro nga dili ang kinatibuk-ang kantidad ang maaprobahan tungod kay aduna’y gisukip ang mayor nga intelligence fund nga P4.9 milyones nga dili angay ihatag tungod kay ang una’ng budget gihatag kini ngadto sa mga tawo nga kriminal og pamarug. (BANAT NEWS)