Nindot nga karsada gub-on gyud aron aspaltuhon

CEBU, Philippines - Daghan ang nakapanglingo-lingo nga nagtan-aw sa nindot ug sinaw pa kaayong karsada nga kabahin sa D. Jakosalem Street duol sa eskena Legazpi nga gipaguba sa Department of Public Works and Highways (DPWH) aron aspaltuhon ra usab pagbalik.

Mga magbubuhis gianugonan kaayo sa minilyon ka pesos nga gastuhon sa kagamhanan alang niining mao nga road asphalting project kay ang dalan D. Jakosalem nindot pa kaayo agian sa mga sakyanan.

Ang bahin sa D. Jakosalem duol sa Cebu City Hall ingon man sa likud nga bahin sa Cebu Metropolitan Cathedral gisugdan na sa pagkaras-karas sa kontraktor nga gi-hire sa DPWH aron ilang aspaltuhon pagbalik.

Si Mayor Michael Rama misugyot nga unta ang DPWH modeklarar na sa pipila ka “city roads” nga agianan kanunay sa mga sakyanan isip mga national roads aron sila na ang momentinar.

Dinhi sa dakbayan sa Sugbo ang dalan Sanciangko usa sa mga karsada nga daghang sakyanan nga mangagi apan nabulit sa mga libaong.  (BANAT NEWS)