CEBU, Philippines - Isubasta sunod tuig ang ihawan sa kagamhanan sa Dakbayan sa Sugbo nga nahimutang sa luna nga sakop na sa Dakbayan sa Mandaue.
Gibutyag ni Mandaue City Treasurer, Atty. Regal Oliva, nga malakip ang ihawan sa 400 ka pribadong establisemento nga napakyas sa pagbayad og buhis.
Matud ni Oliva nga mapugngan lang ang ila’ng lakang kung ang kagamhanan sa Dakbayan sa Sugbo makapakita og mga dokumento nga wala nila gamita isip usa ka negosyo ang pagpadagan sa ihawan.
Gitataw ni Oliva nga ang building lang sa ihawan ang ilang gipaninglan og buhis samtang lakip sa isubasta ang mga luna sa yuta nga ang mga tag-iya wala usab magpakabana sa pagbayad sa buhis.
Samtang si Cebu City Treasurer Diwa Cuevas nagkanayon nga makigtagbo siya kang Cebu City Administrator Lucelle Mercado kun unsa ang angayan nga buhaton ug makig-estorya usab sila pagbalik kang Oliva. (BANAT NEWS)