Kagutom ug kakabus buot sulbaron ni Robredo
CEBU, Philippines – Si Liberal Party vice presidential candidate Kong. Leni Robredo nagkanayon nga kinahanglang mahatagan og patas nga oportunidad ang tanan lakip ang mga tawong nagpuyo sa mga probinsya sa pag-uswag sa nasud.
Usa sa plano ni Robredo mao ang pagsulbad sa kagutom pinaagi sa national feeding program ug buot usab niyang palig-unon ang poverty-alleviation agenda sa administrasyon karon.
Base sa report sa Social Weather Station (SWS) nga 3.5 milyones ka pamilya ang nakasinati og kagutom sa milabay’ng tulo ka buwan o 15 porsiyento sa kapin 100 milyones nga populasyon sa Pilipinas.
Si Robredo kinsa kongresista sa ikatulong distrito sa Camarines Sur adunay susamang programa sa iyang distrito nga nakatabang sa iyang mga konstituwente.
Pinaagi usab sa programa, hasta ang mga gagmay nga mag-uuma nabulahan tungod kay sila maoy nag-supply sa panglutuon sa feeding program nga bayaran sa gobiyerno.
Nag ung-ong pa karon sa kongreso ang House Bill No. 6062 kon “National Food Security Act of 2015” aron hatagan og dakong pagtagad ug implimentasyon ang tanang mga programa sa gobiyerno batok sa kagutom ug malnutrisyon.
Sa maong balaudnon, ang Department of Health (DOH) ug Department of Social Welfare and Development (DSWD) gitahasan paghimo sa maong programa.
Nagtuo si Robredo nga pinaagi niini madasig ang mga mag-uuma ug aron masulbad usab ang kakuwangon nila sa panalapi ug makatabang pagwagtang sa kagutom sa nasud. (BANAT NEWS)
- Latest
