CEBU, Philippines - Gumikan sa kagutom, kauhaw ug kakapoy mikanaog na ang usa ka lalaki lima ka adlaw nga nagtungtong ibabaw sa punoan sa lubi sa barangay Kambantog lungsod sa Argao kagahapon sa buntag.
Ang mikanaog gikan sa ibabaw sa lubi mao si Nicaror Alviola Jr., 35, nagpuyo sa maong dapit.
Sumala pa ni Senior Inspector Alejandro Batobalonos, hepe sa Argao Police nga nahinabi sa Banat News gikapoy na ang mga tawo, polis ug mga rescuers sa pagpaabot nga mokanaog si Alviola mao nga ila na lang kining gibiyaan niadtong Martes sa gabii.
Apan kagahapon sa buntag nakurat na lang ang mga ginikanan ni Nicanor sa dihang kalit kining mibutho sa ilang balay nga nangita og pagkaon ug mainom.
Matud pa ni Batobalonos nga gikapoy na kini ibabaw sa lubi bisan nag-ulan ug init sukad pa niadtong Sabado nga way kaon ug tubig nga giinom.
“Ako man tong giingnan ang ginikanan nga dili patagaan og pagkaon, tubig kay aron manaog,” sumala pa ni Batobalonos.
Nasuta nga nihubag na ang samad sa iyang duha ka bukton nga giingong iyang gilaslas sa wala pa kini misaka sa taas sa lubi.
“Gipangutana man ni siya og nganong dili siya monaog, ang ingon niya nga lima ka adlaw daw siya magpuyo didto, mura’g ni-check in, unya ikalima man ron nga adlaw (kagahapon), nanaog gyud hinuon,” saysay pa ni Batobalonos.
Gibutyag usab ni Batobalonos nga niadtong adlaw nga Martes sa miaging semana gigalgal sa usa ka higala si Alviola ug gipugos sa pagsuyop og drugas ug pagbalik niini sa ilang balay nagsige na kini og yawyaw nga adunay tawong gustong mopatay kaniya. (BANAT NEWS)