CEBU, Philippines – Napili ang siyudad sa Sugbo isip usa sa 967 ka benepisyaryo sa Department of Science and Technology alang sa P1.4 bilyones nga free-wifi internet service lukop nasud.
Si DOST Undersecretary Louis Napoleon Casambre nipahibawo niini pinaagi sa usa ka suwat nga nadawat niadto’ng Oktubre 19.
Matud ni City Administrator, Dr. Lucelle Mercado, nga daku’ng kalipay sa siyudad nga napili isip usa sa mga benepisyaryo sa proyekto ilabi na wala’y gasto ang siyudad kun dili ang kooperasyon lang niini sa pag-implementar.
Gani matud ni Mercado nga adunay mobisita sa siyudad karong buwana nga taga DOST aron mosuta kun asa ipahimutang ang mga ekipo nga mohatag sa free internet access sa mga Sugbuanon.
Sulod sa suwat ni Casambre, iyang gipahibawo ang siyudad nga nangayo kini og suporta ug kooperasyon aron makapahigayon og site inspection ug sa installation sa mga ekipo.
Giumol ang proyekto ubos sa kampanya’ng “Internet for all” ubos sa Philippine Digital Strategy of 2011-2016.
Ang mga lugar nga pwede’ng butangan sa ekipo mao ang parks, libraries, hospitals, rural health units, public high schools, state universities and colleges, terminals, local government units, national government agencies ug uban pa. – /GMR) (BANAT NEWS)