CEBU, Philippines – Kapin sa 400 ka tawo ang giisyuhan og citation tickets sa mga sakop sa Cebu City Environmental Sanitation Enforcement Team (CESET) ug Barangay Environmental Officers (BEO) tungod sa pagpataka og labay sa basura ug pagpanabako sa mga sam-ang.
Matud ni Grace Luardo, hepe sa CESET ug supervisor sa kapin 400 ka BEO, nga ang ila’ng kampanya sa pagpanakop sa mga malapason sa ordinansa diha sa mga sam-ang ipadayon hangtud pa karong buntag.
Daan na nga si Luardo nagpahibalo nga manakop sila sa mga tawo nga dili motuman sa gilatid sa ordinansa. Gipahinum-duman ni Luardo kadto’ng mga naisyuhan og citation tickets nga bayaran ang ila’ng obligasyon aron dili sila mapasakaan og kaso sa hukmanan.
Kadto’ng mobayad dayon sa multahan nga dili maghuwat nga moabot pa sa korte ang kaso makabayad lang og P500 apan kun adto na sila mohukom nga makig-amicable settlement human sa pagpasaka og kaso, ang ilang bayranan moabot na og P2,500.
Gitataw ni Luardo nga ang iyang mga sakop gawas nga manakop sa mga magpataka og labay’g mga sagbot, manilhig usab aron sa pagpahapsay sa mga sam-ang.
Apil ang mga sementeryo sa bukid na nga kabarangayan sa dakbayan sa Sugbo ang gidestinuhan ni Luardo sa iya’ng mga sakop.
Hinuon tungod kay dili man maato sa mga sakop sa CESET ang pagbantay sa gatusan ka katawhan nga mosulod sa mga sam-ang, makita gihapon nga nagkatap gihapon ang mga sagbot nga nagpasad sa sulod ug palibot sa mga sementeryo. (BANAT NEWS)