Seguridad sa Kapitolyo gihugtan

CEBU, Philippines – Human sa pagkawagtang sa sakyanan sa manghud ni Bokal Grecilda Sanchez nga si Greco Sanchez, gipaubos sa heightened alert ang security sa Kapitolyo.

Ang hepe sa Civil Security Unit sa Kapitolyo, Roberto “Bobby” Legazpi, niingon nga ang mao’ng insidente ang una’ng hitabo ubos sa administrasyon ni Gobernador Hilario Davide III.

Niadto’ng Lunes sa udto ang SUV ni Greco nga giparada atubangan sa Legislative Building ang gikawat.

Si Legazpi nagkanayon nga naghatag na sila og kopya sa footage sa close circuit television (CCTV) camera sa National Bureau of Investigation, Highway Patrol Group ug kapolisan.

Gibutyag ni Legazpi nga wala’y mga CCTV camera sa Legislative Building apan duna sila’y footage sa mga sakyanan nga mosulod ug mogawas sa Capitol Compound.

Matud ni Legazpi nga diha sa footage naila nila ang sakyanan ni Greco apan wala nila maklaro ang sakay niini tungod kay tainted ang bildo sa sakyanan.

Dugang ni Legazpi nga ang CCTV system sa Capitol Compound gikatakda nga i-upgrade ug nagplano usab sa pagbutang og mga CCTV units sa Legislative Building. – /GMR) (BANAT NEWS)

Show comments