CEBU, Philippines – Nakaplagan sa mga residente sa duha ka managlahi’ng lugar sa dakbayan sa Sugbo ang duha ka patay nga puya sa niagi’ng adlaw.
Nakaplagan sulod sa Cebu City Veterans Memorial Cemetery sa Bliss, Labangon, ang duha ka buwan nga patay nga puya nga gisulod sa grapa pasado alas 10 sa buntag niadto’ng Domingo.
Base sa imbestigasyon nga samtang naglimpyo si Benjun Briones, caretaker sa CCVMC, ug iya’ng kapuyo sa mga nitso sa sementeryo nakit-an nila ang usa ka grapa. Diha’ng gisusi ang sulod sa grapa nasuta nga usa ka patay nga puya nga gi-preserve hinungdan nga iya dayong gipahibawo ang ila’ng buhatan nga mao’y nanawag sa kapolisan.
Samtang laing puya ang nakaplagan sa mga residente sa barangay Calamba sa may estero sa V. Rama pasado alas 11 sa buntag niadto’ng Domingo.
Base sa imbestigasyon sa Homicide Section sa Cebu City Police Office nga may ni-report sa tanod nga si Julito Belarma nga may usa ka patay nga puya nga nakit-an sa estero.
Nasuta nga ang mao’ng puya mga pito ngadto sa walo ka buwan pa ang pangedaron.
Apan sa pag-abot sa mga polis ug sa mga sakop sa Emergency Response Team wala na’y vital signs ug patay na ang mao’ng puya.
Gisusi pa sa mga sakop sa Homicide Section kun duna ba’y mga mabdos o bag-ong nanganak sa lugar nga posible’ng mao’y nilabay sa puya. – /GMR) (BANAT NEWS)