Pag-ayo sa Museo Sugbo kuti
CEBU, Philippines – Kuti nga pagtuon ang buhaton sa contractor sa restoration sa Museo Sugbo aron mauli sa orihinal nga hitsura ang mga naguba sa linog sa nahisgutang edipisyo.
Ang desinyo gihimo niadto’ng 1869 ni Domingo de Escondrillas, usa ka Spanish architect sa Sugbo, kinsa niadto’ng panahona mao lang ang architect sa nasud.
Si Architect Reynaldo Inovero sa JS Lim Construction ug kanhi hepe sa National Reservation, nagkanayon nga karong buwana lang sila nagsugod sa proseso sa restoration diin una nila’ng gibuhat ang clearing operation aron makita ang mga guba.
Ang National Historical Commission nigahin og P22 milyones alang sa restoration sa Museo Sugbo ug gihatagan og 180 ka adlaw ang contractor sa paghuman niini.
Ang istruktura gitukod niadto’ng 1871 ug gikatawag kini og Carcel del Distrito tungod kay nagsilbi kini’ng prisohan sa tibuok Visayas.
Mga 1940’s hangtud 2004, kini gihimo nga city ug provincial jail sa Sugbo apan diha’ng nagkadaghan na ang populasyon sa mga piniriso, ang gobiyerno nihimo og mas daku nga prisohan.
Ang edipisyo gigamit usab kini kaniadto nga buhatan sa Department of Education una pa kini gihimo’ng museum.
Si Ma. Cecelia Cabañes, curator sa Museo Sugbo, nagkanayon nga dunay plano nga modawat sila og mga event sa museum sama sa birthday ug kasal aron madugangan ang ila’ng kita.
Ang standard nga entrance fee sa Museo Sugbo mao ang P70 ug P50 sa mga estudyante apan kung residente ka sa Pilipinas ang entrance fee sa dagku P30 lang, P10 sa estudyante, senior citizens ug persons with disability.
Dugang ni Cabañes nga gibana-bana’ng moabot sa P2 milyones matag tuig ang kita sa museum. – /GMR) (BANAT NEWS)
- Latest
