CEBU, Philippines – Nabulit sa bun-og ang kalawasan sa usa ka suspetsado nga kawatan nga nadakpan sa akto sa tag-iya ug mga silingan sa Consuelo Village, Basak, dakbayan sa Mandaue alas 7 pasado sa niagi’ng gabii.
Si Police Officer 1 Glenn Sollano sa Presinto 3 sa Mandaue City Police Office (MCPO) niila sa nadakpan nga si Jayme Sabate, 27, anyos nga taga sitio Basbas, Pagsabungan sa mao’ng dakbayan.
Matud ni Sollano nga ang biktima nga si Liven John Romano, 34, nga nagpuyo sa mao’ng dapit natahap na daan nga adunay tawo nga nakasulod sa ila’ng panimalay diha’ng namatikdan niini nga naabli na ang pultahan.
Dali nga nakapangayo og panabang sa mga silingan ug ila’ng gi-atangan ang paggawas sa kawatan.
Sa paggawas na, nagbitbit na sa usa ka laptop ang suspek gikan sa sulod sa panimalay sa biktima hinungdan nga gisugat kini sa mga silingan sa pagkulata.
Dugang ni Sollano nga sanglit may mga bun-og man sa iya’ng kalawasan ang dinakpan, gidala kini sa Mandaue City Hospital alang sa pagpatambal. - /GMR) (BANAT NEWS)