CEBU, Philippines – Patay nga napalgan ang usa ka 63 anyos nga lalaki nga gituohang natagak sa pangpang nga gikubkob sa quarry diha sa barangay Dunggoan, dakbayan sa Danao.
Si Senior Police Officer 3 Rodrigo Roble Jr. nga maoy nakatubag sa alarma miila sa namatay nga si Camilo Villarin Diamante, nagpuyo sa maong dapit.
Matud pa ni Redoble, si Dr. Eric Echavez medico legal officer sa maong dakbayan nisusi sa patay’ng lawas sa biktima ug mideklarar niini nga patay na.
Gituohan nga naglakaw ang biktima sa ibabaw nga bahin dihang aksidente kining natagak ngadto sa lungag nga agi sa gikubkob nga anapog.
Usa ka Roel Canoy, 30, ug mga kauban nga taga barangay Cabangahan sa maong dakbayan maoy nakakaplag sa patay’ng lawas sa biktima.
Samtang walay nakitang foul play sa kamatayon sa usa ka welder nga gikatahong namana sa kadagatan sa Sitio Looc, barangay Tayud, Consolacion alas 8 pasado ang takna sa buntag niadtong Biyernes.
Si Police Officer 1 Socrates Borinaga sa Consolacion Police Station miila sa namatay nga mao si Amrafil Miñoza Locabon, 33, taga Purok Luy-a, barangay Calero, Lungsod sa Liloan.
Matud pa ni Borinaga kaadlawon pa nga mibiya sa ilang balay si Locabon aron mamana sa dagat, apan wa na kini mabalik.
Dangtan pila ka oras, napalgan kini nga naglutaw sa dagat apan patay na. Gidudahan nga nalumos ang biktima. (BANAT NEWS)