Ginang gipatay sud sa balay

CEBU, Philippines - Patay ang usa ka ginang nga gipusil sa sulod sa iyang balay diha sa Purok Santan, sitio Kawayanan sa barangay Yati, lungsod sa Liloan alas-6 kagahapon sa buntag.

Matud pa ni Senior Police Officer 4 Roy Sosvilla, imbestigador sa Liloan Police Station ang namatay mao si Belhsadar Joyag Longakit, 40, nagpuyo usab sa maong dapit.

Matud pa ni Sosvilla wala magtuo ang anak sa biktima nga gipusil iyang inahan kay nagtuo lang kining giatake sa sakit dihang nidangop kini kanila aron mahatud sa tambalanan iyang mama.

Apan sa pag-abot sa mga polis dala ang patrolcar aron maoy kargahan sa ginang,  si Police Officer 3 Jesson Gayo miingon nakugang ang mga polis kay nagkadugo ang biktima.

Sa ilang paghiling, aduna diay kini duha ka samad pinusilan sa hawak nga milapos sa tiyan ug dughan.

Dali nilang gidala ngadto sa Liloan Community Memorial and Emergency Services apan gideklarar nga dead on arrival.

Duha ka mga slugs ang nakuha sa crime scene gikan sa wala pa nila matino nga kalibre sa armas. Ang mga silingan mitug-an nga nakabati sila og duha ka boto sa armas apan wala sila masayod kinsay nagpabuto.

Si Sosvilla miingon nga ang bana sa namatay nga si Russel Arthur Longakit, 42,  nga ilang gisukitsukit mialegar nga migawas kini sa ilang panimalay kay adunay  gipalit sa tindahan ug naabtan na lamang ang biktima nga nagbuy-od sa sulod sa ilang panimalay. (BANAT NEWS)