CEBU, Philippines – Usa sa mga plano karon nga panguhaon nga drayber mga babaye alang sa mga hybrid buses nga magsugod na og biyahe sa sunod buwan.
Kini nga plano maoy gusto sa SM Prime Holdings Inc. ug sa subsidiary niini ang Premier Southern Corporation agi og tubag sa paghatag og luna sa kababayen-an sa transportation sector.
Nahasubay usab kini sa tema sa Asia-Pacific Economic Cooperation nga nag-ingon: “Building Inclusive Economies, Building A Better World.”
Si SMHI vice president Marissa Fernan miingon, kini usa ka pamaagi aron nga makita ang High Quality Public Transport System (HQPTS) buses, o gitawag nga “MyBus” maghatag og panginabuhian sa tanan.
Dako kining sukwahi sa mga gipasangil sa mga drayber ug operators nga nanaway sa pagdagan sa MyBus nga mawad-an sila og panginabuhian kun mosugod na kini og biyahe.
“This is a good development; businesses and public’s displacement is unfounded reason knowing that the buses will take underserved routes,” matud pa niya.
Ang MyBus modagan sa Metro Cebu nga may rotang Talisay-Mambaling, Talisay-North Bus Terminal, Talisay-Mactan Cebu Airport ug North Bus Terminal-Mambaling.
Bisan si Transportation and Communications Secretary Joseph Emilio Aguinaldo Abaya miingon nga ang partisipasyon sa kababayen-an sa transport sector makatabang sa “innovative development, economic reform and growth” sa usa ka lugar.
Matud pa niya, pinaagi niini mawagtang na ang mga babag sa kababayen-an aron sila mosaka ug makapakita sa ilang kontribusyon pinaagi sa paghatag kanila og mga oportunidad nga katrabahoan. (Gikan sa The Freeman/EIM)