CEBU, Philippines – Patay ang usa ka lalaki human nabangga sa poste sa suga ang gimaneho nga motor diha’ng nisuway unta og overtake sa multicab kagahapon sa kadlawon sa Poblacion III, dakbayan sa Carcar.
Ang namatay naila nga si Earl Sandoy, 24, taga Tangasan Valladolid, sa mao’ng dakbayan.
Base sa imbestigasyon sa kapolisan nga ang duha ka sakyanan pareho’ng padulong sa dakbayan sa Sugbo.
Buot unta unhan sa biktima ang multicab apan sa pag-arangkada niya sa motor nawad-an siya og kontrol niini.
Imbis nga mopasirit siya og dagan sa karsada didto napunta si Sandoy sa kilid sa dalan ug nasampak ang motor sa poste sa kuryente.
Gitabang siya sa mga residente sa dapit ug gidala sa Cebu Provincial Hospital sa dakbayan sa Carcar apan gideklarar na siya nga dead on arrival. - /GMR) (BANAT NEWS)