CEBU, Philippines - Patay ang usa ka babaye nga milayat sa Mactan-Mandaue Bridge habig sa barangay Looc, Dakbayan sa Mandaue kagahapon sa hapon.
Si Police Officer 1 Milven Pelayo sa Presinto 5 sa Mandaue City Police Office (MCPO) miila sa namatay nga mao si Baby Johanna Baguio, taga sitio Timpolok, barangay Babag, dakbayan sa Lap-Lapu. Matud pa ni Pelayo nga ang igsoon sa namatay nga si Felecitas Baguio maoy nag-ila niini.
Ang mga sakop sa Emergency Rescue Unit Foundation (ERUF) daling midala sa biktima sa Mandaue City Hospital apan gideklarar kini nga dead on arrival.
Si Felecitas nga gisukitsukit sa kapolisan miasoy nga sa miagi pang gabii nga nangutana ang namatay labot sa bana niini.
Human sa maong pagpangutana kalit kining nawagtang sa ilang panimalay ug wala na sila masayod kun diin kini mopaingon. – /EIM) (BANAT NEWS)