CEBU, Philippines – Dali’ng nakapangapod-apod si Talisay City Mayor Johnny V. de los Reyes og flyers sa giingong pagka-kombikto ni kanhi kongresista Eduardo Gullas ug kaubanan sa kaso sa P30 milyones nga computerization program nga wala’y appropriation ordinance. Ang suwat ni JVR ang giulohan og "Ang kabahong sa ilang panglimbong nibuto!"
Lakip sa gihisgutan ang pagpalit og fertilizers nga giingong overpriced sa panahon ni Gullas ug kanhi Mayor Socrates Fernandez. Si JVR nibisita sa barangay Poblacion uban sa iya’ng mga sakop ug giwara-wara ang flyers ug aron tapukan sa katawhan, nanghatag kini og bugas dayun tunol sa flyers. Iya’ng gipasiatab nga ang notice of finality sa Commission on Audit ang gipaabot sa Ombudsman aron mapriso ug masuspenso ug dili na makahupot og katungdanan sa gobiyerno si Gullas ug Fernandez.
Apan si Gullas niingon nga nahibawo na siya sa decision sa COA apan ang gipasiatab ni JVR ang pulos bakak ug wala’y kamatuoran. Sigun pa niya nga niduso na sila og motion for certiorari ngadto sa Korte Suprema nga nag-awhag sa pag-review sa kamanduan ug dili ipatuman nga sila pabayron. Si Gullas ug JVR ang mag-atbang pagbalik sa sunod tuig nga eleksyon sa pagka-mayor samtang laing magpapili sa mao’ng posisyon mao si Bise Mayor Romeo Villarante.
Matud ni Villarante nga angay hinuktukan sa katawhan kun si kinsa ang ligdong ug angay nga katuohan sa ila’ng pagserbisyo sa katawhan.
Si JVR ug anak nga si City Administrator John Yre ang nag-atubang usab og kaso’ng graft and corruption gumikan sa pagkuha sa serbisyo sa Black Pearl Security Agency; overpriced nga pagpalit og makina sa pumpboat ug overpriced nga pagpalit sa rescue vehicle base sa COA report. – /GMR) (BANAT NEWS)