CEBU, Philippines – Lalaking giingong adunay warrant of arrest sa kasong frustrated murder gidul-itan pagpusil sa ulo samtang nagbarog kilid sa dalan sa Gorordo Avenue sa barangay Lahug ning dakbayan sa Sugbo sa nakalabay nga gabii.
Giila ang biktima nga si Enrique Solis, alyas Eking, taga barangay Apo lungsod sa Argao ug temporaryo nga nagpuyo sa maong dapit.
Matud pa ni Senior Police Officer 2 Ruth Violango, imbestigador sa Homicide Section sa Cebu City Police Office nga nahinabi sa Banat News ang Argao Police mipahibalo kanila nga adunay pending warrant of arrest ang biktima ug ilaha kining gipangita.
Nagtuo si Violango nga lagmit naabot dinhi sa siyudad ang biktima kay kini nagtago sa iyang kaso.
Gitan-aw karon nga motibo sa kapulisan mao ang personal nga bikil ug ang kalambigitan sa iyang kaso nga giatubang.
Sumala pa nga usa ka lalaking gikan nagpalit og sigarilyo ang milipot sa biktima ug mipusil sa likod sa ulo ni Solis ug ang gunman misakay sa naghuwat nga motorsiklo sa kauban.
Usa ka basiyo sa kalibre .45 ang narekober sa crime scene nga gituohang maoy gigamit sa mamumuno. – /EIM) (BANAT NEWS)