CEBU, Philippines - Duha ka mga nurses ug laing usa ang nabiktima sa pagpanulis sa managlahing lugar sa dakbayan sa Talisay sa miaging adlaw.
Unang hitabo diha sa barangay Poblacion mga alas 3 sa kaadlawon diin usa ka Crizyle Rossete Lariosa, 23, nurse nga padung na mosud sa gate sa ilang balay ang gitulis sa duha ka tawo nga nagsakay og motorsiklo.
Gitionan siya og armas ug gikuha ang iyang bag nga adunay sulod nga P2,000 cash ug importanteng butang.
Mga alas 6:50 sa gabii, laing nurse ang nabiktima sa pagpanguot sakay sa pampasaheroang jeep diha sa barangay Linao. Ang biktima giila nga si Phoebe Marie Basister, 22, kinsa padung na usab pauli sa ilaha sa lungsod sa Minglanilla dihang nahitabo ang pagpanguot.
Matud niya, giablihan iyang bag ug nahanaw na ang iyang sing-sing nga tag P10,000 ug uban pang mga butang.
Nasundan na usab kini dihang gilabnihan ang usa ka Rossana Mirasol Sinajon, 30, sa iyang bag sa duha ka wala mailhing kawatan nga nagmotor diha sa barangay Cansojong.
Ang bag sa biktima adunay sulod nga cellphone nga tag P4,000; cash nga P2,000; tseke nga P20,000 ug uban pa niyang mga butang.
Ang kapolisan padayon pa karong nag-imbestigar sa maong mga insidente. (BANAT NEWS)