CEBU, Philippines - Naalarma ang konseho sa dakbayan sa Sugbo tungod sa kalit nga pagsaka sa withholding tax sa mga kawani sa City Hall bisan wala pa nila nadawat ang Productivity Enhancement Incentives (PEI). Sa privilege speech ni Konsehal Sisiñio “Bebz” Andales, iya’ng gihulagway nga alarming ang withholding tax.
Matud ni Andales nga nasayud siya nga adunay nga mandatory deduction sama sa SSS, PhilHealth ug Pag-Ibig.
“Highly illegal and unlawful on the increase of withholding tax,” matud ni Andales
Gipasabot sa Accounting Department nga ang kalit nga pagsaka sa withholding tax tungod sa PEI. Buot ni Andales nga temporaryo nga ipahunong ang pagkuha sa taas nga withholding tax sa mga kawani ug opisyal sa kagamhanan sa dakbayan sa Sugbo.
Si Konsehal Noel Wenceslao sa iya’ng bahin nipasabot nga ang advance nga pag-iban sa withholding tax tungod kini sa nakab-ot nga maximum bracket nga 32 percent.
Samtang si Konsehal Mary Ann delos Santos wala usab nakauyon sa gibuhat sa Accounting Department sa pagpasaka sa withholding tax.
Ang mga konsehal niingon nga ang kawani sa City Hall wala usab nakahibawo sa pagpasaka sa withholding tax. (BANAT NEWS)