Balay ni jaguar gironda

CEBU, Philippines – Mokabat ngadto sa P4 milyones nga kantidad sa gidudahang shabu ang nasakmit sa kapolisan human ilang gironda ang mga panimalay sulod sa compound sa giingong ilado nga druglord sa barangay Duljo-Fatima sa dakbayan sa Sugbo kagahapon sa kaadlawon.

Pinasikad sa search warrant nga gi-issue ni Regional Trial Court Judge Soliver Peras, ang kapulisan sa Cebu City Intelligence Branch, Philippine Drug Enforcement Agency-7, Special Weapons and Tactics sa Cebu City Police Office, Regional Public Safety Battalion-7 ug sa Women’s and Children’s Protection Desk ang mironda sa “Diaz Compound” nga gipanag-iya ni Jeffrey Diaz alias “Jaguar”.

Dungan nga gironda sa kapolisan ug sa PDEA7 ang compound nga gipuy-an ni Diaz ug sa iyang mga kaliwat.

Apan dakong kahibulong sa kapolisan nga sa 12 ka panimalay daw limpyo na kaayo. Gidudahan nga nakabantay na sila nga rondahon sila sa mga otoridad.

Apan nakakuha gihapon ang mga otoridad og walo ka dagkong putos ug 32 ka medium-sized nga pakete sa gituohang shabu nga mobalor P4 milyones.

Nakuha ‘sab ang mga armas ug mga bala.

Si Superintendent Romeo Santander, miingon nga “frustrated” siya sa maong operasyon tungod kay wala sila’y nadakpan bisan pa man nga naa sila’y nakuha nga ebidensya sa mga panimalay nga gironda.

Labi na nga nakapasamot sa iyang frustration tungod kay tulo na  nila kini ka bulan nga gi-surveillance subay sa mando ni Chief Superintendent Prudencio Tom Bañas, direktor sa Police Regional Office 7.

Matud pa ni Santander nga ila  ning gibuhat sa balay ni Jaguar aron ipakita sa katawhan nga wala ni bisan kinsa sa dakbayan ang “untouchable.”

Bisan kinsa nga molapas sa balaod dakpon ug pagasilotan g’yud apan nagpabilin nga tanghaga nganong murag nakahibawo nang daan si Jaguar ug wala nay mga tawo ang 12 ka balay nga ilang gironda.

Busa si Santander magpahigayon og imbestigasyon aron mahibaw-an kung duna bay mi-leak sa impormasyon sa maong raid gikan pa sa pag-apply sa search warrant hangtud na sa pag-implimentar niini kagahapon sa kaadlawon.

Sa laing bahin, nabalik pagkatanggong sa prisohan ang usa ka Lemuel Tayapan, human subli kining nadakpan sa kapulisan diha sa Buot Compound, barangay Tuburan sa dakbayan sa Danao niadtong niaging gabii. Ang mga sakop sa Regional Anti Illegal Drug Special Operations Task Group sa Police Regional Office-7 pinangulohan ni Sr. Insp. Joey Bicoy nihimo og buy-bust operation niadtong Sabado sa gabii.

Si Tayapan gidakop human nibaligya og usa ka medium size nga  shabu nga balor P8 mil ug nakuhaan og laing lima ka mga medium nga  30 ka gramos.

Ang tanang nasakmit nga illegal nga drugs mobalor ngadto sa P354 mil base sa Dangerous Drugs Board nga kantidad.

Sigon ni Bicoy nga si Tayapan bag-o nakagawas gikan sa prisohan niadtong miaging bulan human kini makapiyansa tungod gihapon sa illegal nga drugas. – /EIM) (BANAT NEWS)